VIKUNDI 64 VYA WANAWAKE, VIJANA, NA WATU WENYE ULEMAVU, VYAPATIWA MIKOPO YA ASILIMIA 10

Posted on: May 15th, 2025

Mwenyekiti wa Halmashauri ya Wilaya ya Singida,  Mhe. Elia Digha ameongoza makabidhiano ya mfano wa hundi, kwa wanufaika wa mikopo ya asilimia 10, ambao ni vikundi vya wanawake, vijana na watu wenye ulemavu.

Makabidhiano hayo yamefanyika katika kikao cha pili cha baraza la madiwani cha robo ya tatu, kilichoketi katika ukumbi wa mikutano wa Abdallah Nkumbi, uliopo katika Kata ya Ilongero,  ambapo jumla ya fedha kiasi cha shilingi Milioni 354,939,500/= zimegawiwa kwa vikundi 64, ikiwa vikundi 34 vya wanawake wamekabidhiwa  jumla ya Shilingi Milioni 151,850,000/= vikundi 25 vya vijana wamekabidhiwa Milioni 189,986,000/= na vikundi 7 vya watu wenye ulemavu wamekabidhiwa shilingi Milioni 13,103,000/= na fedha zote hizo zimekwisha kuwekwa katika akaunti zao.

Katika makabidhiano hayo, Mhe. Digha aliungana pamoja na Mbunge wa jimbo la Ilongero, Mhe. Ramadhan Ighondo, na Mkurugenzi Mtendaji wa Halmashauri, Bi. Ester Chaula ambao kwa pamoja, waliwasisitizia wanufaika wa mikopo hiyo kuhakikisha wanafanyia kazi vizuri fedha hizo kulingana na matumizi  waliyopanga, ili waweze kutengeneza faida na kisha kuzirejesha kwa uaminifu kwakuwa fedha hizo ni mkopo na sio zawadi.