"NENDENI MKASIMAMIE MIRADI VIZURI NA IISHE KWA WAKATI” - MHE. ELIA DIGHA.

Posted on: May 13th, 2025

Mwenyekiti wa Halmashauri ya Wilaya ya Singida,  Mhe. Elia Digha amewasisitizia watendaji wa serikali ngazi ya Kata na Halmashauri, kusimamia miradi ya maendeleo na kuhakikisha inamalizika salama na kwa wakati.

Mhe. Elia Digha ameyasema hayo leo, akifungua mkutano wa Baraza la Madiwani wa robo ya tatu, uliofanyika katika ukumbi mkubwa wa mikutano uliopo katika ofisi za Halmashauri, na kuhudhuriwa na wageni mbalimbali wakiwemo viongozi wa kisiasa, baadhi ya wananchi, pamoja na watendaji wa serikali kwa ngazi ya Kata na Halmashauri.

Akitoa salamu za ufunguzi wa mkutano huo, Mhe. Digha amewasisitizia atendaji wa kata na wakuu wa idara za Halmashauri kuhakikisha wanafanyia kazi vizuri, fedha zilizoletwa kwaajili ya miradi ya Maendeleo. 

“Kuna fedha zimeingia muda sio mrefu, bado hazijaanza kazi, kuna baadhi ya shule za misingi zimepata fedha, kwahiyo naomba kwa fedha zile zilizokuja juzi, naomba watendaji wa kata mlioko kwenye maeneo yenu, pamoja na wakuu wa idara husika, hakikisheni zile fedha zinafanya kazi vizuri. Kuna baadhi ya shule zimepata vyumba vya madarasa, na wengine wamepata nyumba za walimu, kwahiyo nendeni mkasimamie ile miradi vizuri na iishe kwa wakati” Alisema Mhe. Digha.

Vilevile, suala la ukusanyaji wa mapato limeendelea kusisitizwa, hasa kwa watendaji wa kata, ambapo katika uwasilishwaji wa taarifa za utekelezaji wa shughuli za Halmashauri kwa kila kata, suala la ukusanyaji wa mapato limechukua uzito mkubwa.

Hata hivyo, Mwenyekiti wa Halmashauri amewasisitizia watendaji wa kata kuhakikisha wanakaba mianya yote ya mapato, ili kufikia lengo la ukusanyaji wa mapato kwa asilimia mia moja, ambapo kwa mwaka wa fedha 2024/2025, lengo la Halmashauri lilikuwa ni kukusanya shilingi Bilioni 2.6, hivyo kufikia mwishoni mwa mwezi wa sita,  kila Mtendaji wa kata, anatarajiwa kufikisha Asilimia Miamoja katika ukusanyaji wa mapato kulingana na kiasi alichopangiwa kukusanya katika kata yake.