MAAFISA MAENDELEO YA JAMII NGAZI YA KATA WAPEWA MAFUNZO YA USIMAMIZI WA MIKOPO YA ASILIMIA KUMI

Posted on: October 9th, 2024

Wataalamu wasimamizi wa mikopo (Maafisa Maendeleo ya jamii ngazi ya kata) wamepatiwa mafunzo kuhusu kanuni na muongozo wa usimamizi wa utoaji wa mikopo kwa vijana, wanawake na watu wenye ulemavu kwa lengo la kuwawezesha kwenda kusimamia utoaji wa mikopo ya asilimia 10 kwa walengwa katika kata zao.

Mafunzo hayo yalihusisha elimu ya usimamizi wa utoaji mikopo kwa vijana, wanawake na watu wenye ulemavu na namna ya kutumia mfumo wa kielektroniki (Wezesha Portal) utakaosaidia vikundi vya vijana, wanawake na watu wenye ulemavu kujisajili na kupata cheti ili waweze kuomba mkopo wa asilimia kumi usio na riba.

Mafunzo hayo yamefanyika kuanzia tarehe 5 Oktoba, 2024 hadi tarehe 9 Oktoba, 2024 katika ofisi za Halmashauri ya Wilaya ya Singida zilizopo katika kijiji cha Mwahango yakiongozwa na timu ya wawezeshaji kutoka Idara ya Maendeleo ya Jamii ya Halmashauri.